Լատինական Ամերիկայից ժամանած շուրջ 150 ներգաղթյալ փորձել է հատել ԱՄՆ-ի և Մեքսիկայի սահմանը Տիխուանա մեքսիկական նահանգի մոտ: Ինչպես հաղորդում է DW.com-ը, հղում անելով ԱՄՆ սահմանապահ ծառայությանը, ամերիկացի սահմապահներն արցունքաբեր են գազ կիրառել փախստականների նկատմամբ, երբ ամբոխն սկսել է քարեր նետել իրավապահ մարմինների ուղղությամբ: Սրա հետևանքով 25 մարդ է ձերբակալվել, որոնց թվում՝ երկու անչափահաս: Մյուս ներգաղթյալները կարողացել են վերադառնալ Մեքսիկայի տարածք: Միևնույն ժամանակ Associated Press-ի ֆոտոլրագրողի հաղորդմամբ՝ ներգաղթյալները սկսել են քարեր նետել, երբ սահմանապահներն ուժ են գործադրել: Մեքսիկայի ՆԳՆ-ն կատարվածի առթիվ դեռևս հայտարարությամբ հանդես չի եկել: 2018-ի նոյեմբերին տեղի ունեցած նմանօրինակ միջադեպից հետո մեքսիկական իշխանությունները հետաքննություն էին սկսել՝ արցունքաբեր գազի կիրառումը դիտարկելով որպես զենքի կիրառում պետության դեմ: